bb 妹4個月後治療進度

時間過得好快！ 唔經唔覺bb妹接受咗治療都4個月了。每日都見住佢進步真係好開心！
雖然相比同年嘅小朋友， bb 妹都係delay 咗成年， 而講野方面仲更加唔只，到而家兩歲半都係識講幾隻字。 但對有自閉症嘅bb 妹， 我覺得佢做得好好， 一直都無放棄過。 由一開始上堂坐唔定又唔肯follow direction, 又一唔鐘意就發脾氣嘅佢， 到而家可以坐到最少15分鐘，然後俾佢行個round, 再返埋位坐，多數可以complete task,  更沒有再發脾氣添！

因為bb  妹唔識用言語表達自己，老師教咗少少手語-give me,  open,  drink/eat,  more,  point- 令到bb 妹多咗表達自己 & 多咗選擇自己要嘅野。

最近， bb 妹無端端拎隻spoon 放落我個口(當時呆咗幾秒-好開心) ， 之後我拎隻公仔(monchichi) 出嚟，話monkey is hubgry too,  do you want to feed him? 佢就用隻spoon 餵公仔喇！

最近， bb 妹會同陌生人揮手(叫佢做先會),  同埋daddy 放工返嚟會走過去揮手呢！

bb妹嘅每一個進步都令我哋好proud of 佢！我知道，每一個task對佢嚟講都係一個挑戰。 如果唔係親身經歷到， 我係完全唔會明白，明明係好簡單嘅野， 對有自閉症嘅人嚟講，可能係會難10倍/100倍/1000倍，亦可能係學極都唔會學識。

我媽每次見到我都同我講，同bb 妹講多d 野，repeat 教佢野就自然會學到。 又話不如試吓呢d試吓嗰d 方法啦...我好想同佢講，你點知我哋無試唔同方法？ bb 妹唔同妹妹或其他小朋友一講就明。 就算書本/online/anywhere有講關於自閉症，你無經歷過真係永遠都唔會知道你就算做幾多教幾多講幾多示範幾多次，個結果都唔一定係理(您) 想--嗰個心情係唔會感受到嘅。 
而家我哋只係想bb 妹可以maintain 而家所學到嘅野，一步一步嚟，唔好俾太大壓力大家。
呢條路一定唔會易行...我哋每一個都會陪bb 妹一齊行，一齊進步！